Kalaallit Nunaani Naligiisitaanissamut Siunnersuisoqatigiit Kalaallit Nunaanni Inatsisartut kajumissaarneratigut, nunatsinni Nalgiissitaanerup Ulluanit 20. Maj siorna pilersippaat.

Naligiissitaaneq pillugu ullorsiornermi, arnat angutillu naligissitaanissaat siunertaralugu iliuuserineqarsinnaasut ersarissumik siaruarterneqartassapput. Arnat angutillu angerlarsimaffimmi atugarisatigut naligiimmik atugassaqartitaanissaannik nalinginnaasumik ajornartorsiutigineqartartut saniatigut, arnat angutillu inuiaqatigiinni naligiissitaanissaat anguniarlugu aporfiusartut amerlasoorujussuupput, tamanna Naligiissitaanissamut Siunnersuisoqatiigiit aaqqiissuussamik suliniutigalugu iliuuseqarfiginiarpaat.

Arnat angutillu Kalaallit Nunaanni naligiissitaanissaaq anguniarlugu aaqqissugassarpassuaqarpoq.

Angutit ilinniagaqarsimasut ikiliartorlutik ajornartorsiutigineqarnerat Naligiissitaanissamut Siunnersuisoqatigiit isumakulunnartoqartippaat. Naatsorsueqqissaartarfiup naatsorsuutaasigut erserpoq, arnat angutinut naleqqiullugit 33 procentimik akissaatikinnerusartut, arnaaneq angutaanerluunniit apeqqutaatillugit inuiaqatigiinni nakuusertarnerit amerlavallaaqaat, arnat pisortatut atorfeqartitaasartut ikippallaaqaat aamma arnat suliffeqarfinni politikkikkut aqutarineqartuni pisortatut atorfeqartitaasartut ikippallaaqaat aamma meerartaarluni sulinngiffeqartarnerit arnat angutillu akornanni equngasumik atugaavoq.

Naak peqqarniisertarnerit pineqaatissiissutaasaraluartut, arnat meeqqallu amerlavallaat peqqarniiserfigineqartarput. Angutit arnanut peqqarniisertarnerat ersarissorujussuuvoq, taamaattumik angutit arnanut peqqarniisertarnerat assigiinngissuteqarnermik tunngaveqarpoq. Qanoq iliorluta arnanut peqqarniisertarnerit unitsissinnaavagut?

Angutit arnanut naleqqiullutik ilinniartitaanermi ilinniagaqarsimasuunnginnerat ajornartorsiutaavoq. Qanoq iliorutta angutit ilinniarsimasut amerlanerusut  pissarsiarisinnaavagut?

Arnat amerlanerujartuinnartut ilinniarluarsimasut suliffeqarfinni sulisorineqartarput, tamanna inuiaqatigiit ineriartornerannut iluaqutaavoq. Qanoq iliornikkut arnat amerlanerusut pisortatut atorfeqartitaasalissappat?

Suliffeqarfiit assigiinngitsunik pisinnaasalinnik siulersuisuni ilaasortaatitallit siuariartornerusarput. Qanoq iliorutta arnat amerlanerusut pisortaqarfinni politikkikkut ingerlatsiviusuni pisortatut sulisorilersinnaavagut?

Ernisimanermi sulinngiffeqarsinnaatitaanerit ilaqutariinnut naligiimmik atugassaqartitaalersitsiinnaratik pitsaasumik atugassaqartitaaffiupput. Qanoq iliorutta erninermi sulinngiffeqartitaanerit pitsanngorsarsinnaavagut?

Kalaallit Nunaata Naatsorsueqqissaartarfiani erserpoq, arnat angutinut naleqqiullugit 33 procentimik akissaatikinnerusut. Angutit ataatsimut isigalugit sulinerusarput, tamatigut pisortaasarput aamma meerartaarnermi sulinngiffeqartitaanerit atorajunneq ajorpaat. Iseritatigut assigiinngissutsit assigiinngitsorpassuarnik patsiseqarput, kisianni tamanna ima isumaqarpoq, arnat angutinut naleqqiullutik akissaatikinnerullutillu appasinnerusunik utoqqalinersiutisisarput. Taamaattumik arnat appasinnerusunik isertitaqartartut pitutttorsimasuullutillu ujariatsisuusarput, pingaartumik utoqqalinerminni. Assigiinngissut tamanna qanoq iliorutta aaqqiivigisinnaavarput?

Kalaallit Nunaanni Naligiissitaanissamut Siunnersuisoqatigiit, naligiissitaanerup oqallisigineqarnissaa pingartitaraat.

Ataqqeqatigiinneq aamma arnat angutillu assigiimmik akisussaaffeqarlutik eriagisarialinnik tunngavilersuillutik kivitseqatigiinnerisigut, Kalaallit Nunaanni naligiissitaaneq sulissutigineqassaaq.

Kalaallit Nunaanni naligiissitaanissamut Siunnersuisoqatigiit oqallisiginnilluarnissassinnik kissaappaasi.

 
Poul Hansen
Naligiissitaanissamut Siunnersuisoqatigiinni siulittaasoq